Монгол Улсын Хөдөлмөрийн баатар, гавьяат тээвэрчин Р.Раш УБТЗ-ын Захиран хуваарилах хэлтсийн 70 жилийн ойд зориулсан “Галт тэрэгний хөдөлгөөний зурмаг-төмөр замын тээврийн ажлын үндсийн үндэс” номынхоо нээлтийг өнөөдөр Удирдах газарт хийлээ.

Номын нээлтэд УБТЗ-ын Замын орлогч нараас гадна алба, хэлтсийн дарга, орлогч, хөдөлгөөний диспетчерүүд, ТЗДС, ПОЛИТЕХНИК КОЛЛЕЖИЙН эрдэмтэн багш нар оролцов. Энэхүү ном нь Р.Рашийн бичиж, нийтлүүлсэн зургаа дахь ном бөгөөд Техникийн бодлого, стандартчлалын албаны орлогч дарга Л.Энхболд редакторлон Замын Ерөнхий инженерийн орлогч А.Батболд хянажээ. Мөн номонд орсон зураг, бүдүүвчийг Тээвэр зохион байгуулалтын албаны Зурмагийн инженер Э.Булганбаяр үйлдсэн байна. Номын зохиогч нээлтийн үеэр хэлсэн үгэндээ “Диспетчерийн хөдөлмөр бол хүнд бөгөөд хийморьтой ажил. Шөнийн ээлжинд гараад өглөө буухад бие ёстой мах болно. Ажил хийж байхад зурмагаас хөндийрөх бололцоогүй. Ариун цэврийн өрөөнд орохдоо хүртэл ахлах диспетчерээ өөрийн оронд гуйж суулгах жишээтэй. Хоолыг гуанзныхан тусгай халуун саванд хийж, арай л халбагадаж өгөхгүй. Ийм л хөдөлмөр” хэмээн диспетчерийн ажлын онцлогийг тодотгосон юм.